Шәфҡәтлелек биҙәй донъяны

2024йылМөмкинлектәреСикләнгәнКешеләрТураһындаХәстәрлекЙылы
#Ниғәмәт_ауыл_модель_китапханаһы
27 сентябрь ауыл модель китапханаһында мәҙәниәт хеҙмәткәрҙәре менән берлектә Ниғәмәт ауыл биләмәһенең мөмкинлектәре сикләнгән балалар, йәштәр, ололары менән «Шәфҡәтлелек биҙәй донъяны» исемле матур сара үтте. Тәүге өлөштә һәр кем үҙе менән таныштырҙы, яратҡан шөғөлө тураһында һөйләне. Китапхана ҡунаҡтары шулай уҡ яңы китаптар менән танышты, пазлдар төҙөнө, йомаҡтарға яуаптар эҙләне. Үрге Яйыҡбайҙан килгән ағинәй, хеҙмәт ветераны Һөйәрбикә Ҡолһарина балаларға изге теләктәрен еткерҙе, Миңзәлә Ҡолһарина үҙенең ижад емештәрен уҡып ишеттерҙе. Әйткәндәй, Һөйәрбикә Әбделкәрим ҡыҙы яңыраҡ ҡына Ҡоролтай депутаты Гөлнур Ҡолһарина ҡулынан Рабиға Ҡушаева исемендәге «Милләт әсәһе» миҙалын алды. Сәлих хәҙрәт Кәримов бик фәһемле нәсихәт һөйләп, ошо сарала ҡатнашыусы һәр кешегә һаулыҡ, илебеҙгә тыныслыҡ теләп, изге доғалар бағышланы. Мәҙәниәт йорто ойоштороусыһы Нурия Ғатауллина, «Һаҡмар» халыҡ театры режиссеры Рәил Хәсәнов матур, моңло музыкаль номерҙар бүләк итте.
Икенсе өлөштә балалар мәҙәниәт йортоноң беренсе ҡатында төрлө халыҡ уйындары уйнанылар, таланттарын, оҫталыҡтарын күрһәттеләр, ритаямға, заманса көйҙәргә бейеп алдылар. Матур осрашыу күмәкләп сәй эсеү, бүләктәр алыу менән тамамланды.
Ошо сараға килгән һәр ауылдашыбыҙға, үҙ ауылының мөмкинлектәре сикләнгәндәрҙе ойоштороп алып килгән Зөлхәбирә Мырҙағәлинаға, Фирүзә Бүләковаға ҙур рәхмәт белдерәбеҙ.
Һеҙгә сикләнмәгән сәләмәтлек, ныҡлы һаулыҡ, оҙон ғүмер, күңел тыныслығы, именлек, шатлыҡ теләйбеҙ! Күк йөҙө аяҙ, үҙебеҙ бәхетле, һәр көнгә рәхмәтле, һәр кемгә шәфҡәтле булайыҡ!